पुणे : पुणे महापालिकेच्या ५६व्या महापौर म्हणून मुक्ता टिळक यांच्या निवडीवर अखेर शिक्कामोर्तब झाले. बुधवारी (१५ मार्च) झालेल्या निवडणुकीत टिळक यांना ९८, तर त्यांच्या प्रतिस्पर्धी राष्ट्रवादी काँग्रेसच्या नगरसेविका नंदा लोणकर यांना ५२ मते मिळाली. पुणे महापालिकेच्या ६७ वर्षांच्या इतिहासात महापौरपदी विराजमान होणाऱ्या टिळक या भारतीय जनता पक्षाच्या पहिल्याच नेत्या आहेत. तसेच त्या पुण्याच्या नवव्या महिला महापौर झाल्या आहेत. उपमहापौरपदी ‘रिपब्लिकन पार्टी ऑफ इंडिया’चे नवनाथ कांबळे निवडून आले. काँग्रेसच्या लता राजगुरू यांचा त्यांनी पराभव केला.
महापौर टिळक आणि उपमहापौर कांबळे या दोघांनाही पुण्याचे पालकमंत्री गिरीश बापट, खासदार अनिल शिरोळे, खासदार संजय काकडे, भाजपचे शहराध्यक्ष योगेश गोगावले, आमदार माधुरी मिसाळ, मेधा कुलकर्णी, जगदीश मुळीक, योगेश टिळेकर, भीमराव तापकीर आदींनी शुभेच्छा दिल्या.
‘शाश्वत विकास महत्त्वाचा’
‘पुणे शहराचा सर्वांगीण आणि शाश्वत विकास करणार, खर्चावर मर्यादा आणणार, महत्त्वाचे प्रकल्प मार्गी लावणार,’ अशी ग्वाही देतानाच ‘पुणेकर हाच आपल्या कामकाजाचा केंद्रबिंदू असेल,’ असा शब्दही टिळक यांनी दिला. ‘भारतीय जनता पक्षाच्या कार्यकर्त्यांनी गेली ६७ वर्षे केलेल्या कामामुळे मिळालेले हे फळ आहे. सर्वांच्या मदतीने ‘आधुनिक शहर’ अशी पुण्याची ओळख निर्माण करण्याचा आमचा प्रयत्न राहील,’ असेही टिळक म्हणाल्या.
मुक्ता टिळक यांच्याबद्दल...
पुणे महापालिकेत या वेळी भाजपचे ९७ नगरसेवक निवडून आल्यामुळे पक्षाला एकहाती सत्ता स्थापन करता आली आहे. मुक्ता टिळक यांची नगरसेवक म्हणून निवडून येण्याची ही चौथी वेळ असून, या वेळी त्या तब्बल २३ हजारांच्या मताधिक्याने निवडून आल्या. याआधी त्यांनी पालिकेतील स्थायी समितीसह अन्य सर्व समित्यांवर काम केले असून, २००७ ते २०१२ या कालावधीत त्या भाजपच्या गटनेत्या होत्या. मुद्देसूदपणे प्रभावी भाषण करण्याची त्यांची हातोटी आहे. या सगळ्या पार्श्वभूमीवर भाजपच्या पहिला महापौर बनण्याची महत्त्वाची जबाबदारी त्यांच्याकडे देण्यात आली आहे. लोकमान्य टिळक यांनी सुरू केलेल्या सार्वजनिक गणेशोत्सवाला १२५ वर्षे होत असतानाच टिळक कुटुंबीयांकडे पुण्याच्या महापौरपदाची सूत्रे जाणे हा एक योगायोगच आहे.
मुक्ता टिळक यांनी मानसशास्त्रातून एमए केले असून, जर्मन भाषाही त्यांना अवगत आहे. मार्केटिंग एमबीए, तसेच पत्रकारितेचे शिक्षणही त्यांनी घेतले आहे. त्यांचे पती शैलेश हे आंतरराष्ट्रीय ज्युदोपटू असून, विविध सामाजिक संस्थांवर काम करतात.
नवनाथ कांबळे यांच्याविषयी...
१९९७मध्ये पहिल्यांदा नगरसेवक झालेले नवनाथ कांबळे यांची महापालिकेत निवडून येण्याची ही तिसरी वेळ आहे. पहिल्या वेळी ते स्थायी समितीचे सदस्य होते, तर दुसऱ्या वेळी ते शहर सुधारणा समितीचे अध्यक्ष होते. आता तिसऱ्या वेळी त्यांना उपमहापौरपदाचा मान मिळाला आहे. अतिशय प्रतिकूल परिस्थितीवर मात करून कांबळे यांनी हे यश मिळवले आहे. दुष्काळामुळे कांबळे यांचे कुटुंब पुण्यात स्थलांतरित झाले. उपजीविकेसाठी त्यांनी शेंगा विकण्याचे काम केले आहे. शिक्षण सुरू असतानाच त्यांनी समाजसेवा सुरू केली. सुरुवातीला ते दलित पँथर चळवळीशी जोडले गेले. ‘आरपीआय’चे शहराध्यक्ष म्हणूनही त्यांनी काम केले आहे. बोपोडीतील ठ. रा. पाडळे यांच्यानंतर तब्बल ५७ वर्षांनी ‘आरपीआय’च्या कार्यकर्त्याला पुणे महानगरपालिकेतील हे महत्त्वाचे पद मिळाले आहे.
नितीन काळजे पिंपरीचे महापौर
पुण्याजवळच्याच पिंपरी-चिंचवडमध्येही भाजपचीच सत्ता आली आहे. भाजपचे नितीन काळजे यांची महापौरपदी, तर भाजपच्याच शैलजा मोरे यांची उपमहापौरपदी बिनविरोध निवड झाली. मंगळवारी ही निवडप्रक्रिया झाली. राष्ट्रवादी काँग्रेसच्या उमेदवारांनी अर्ज मागे घेतल्याने बिनविरोध निवड झाली.